Auß Prag vom 10. Ditto.
[#1:]
Obwoln den 7. diß
die Herrn Commiſſarien auß Mähren widerumb anhero
gelangt/ vnnd vorgeſtern/ als den 8 etc. den Herrn Directorn Relation gethan/ iſt
doch dieſelbe von den Herrn Mährern ſchrifftlich verfaſſet/ vnnd den Commiſſa-
rien nach Prag ertheilt worden/ welche Relationſchrifft/ wegen kürtze der zeit/ noch
nicht zu bekommen/ dahin man ſich gedulden muß/ Allein vernimpt man obiter
hin/ daß es auff guten Weg vnd Mittel ehiſten zum gewündſchten Frieden gelan-
gen wirdt/ So kan man auß Schleſien/ auff welche man auch meiſtentheils ſihet/
vnd ohne iren Conſens in nichts eyngehen kan/ in dem auch der Landtag noch wä-
ret/ nichts vernemmen/ halten ihr geworbenes Volck auff den Polniſchen Gren-
tzen noch in ſtäter bereitſchafft. Herr von Nachat/ etc. Oberſter in Mähren vber
die Reuterey/ hat den Böhmiſchen Commiſſarien zu ehren ein ſtattlich Pancket
gehalten/ darbey die Heerpaucken vnd Trom̃eten/ vnangeſehen der Keyſerin todt/
gebrauchen laſſen.
[#2:]
Man drauwet allhier ſtarck mit Feuwer/ in dem Brenner außgeſchickt/ vnd bey-
des im Läger vnd hier gefangen werden/ bekennen/ daß jrer in die 60. außgeſchickt/
vnnd zuſammen geſchworen/ Wie in gleichem auch auff den Straſſen von Mör-
dern vnnd Räubern gantz vnſicher/ derer beydes viel bekommen/ vnnd anhero ge-
bracht werden.
[#3:]
Die Trom̃eln werden auch noch ſtätigs gerühret/ vnd Knecht geworben/ Vnd
wil das Sterben im Läger noch keine rechte auffhörung gewinnen/ Die Soldatẽ/
ſo der zeit vbereinander ligen/ freuwen ſich auff warme vnnd truckene zeit/ins freye
Feld zu kommen. Herrn Landhofmeiſters von Wallſtein iſt man dieſer Wochen
von Wien wider anhero erwartendt.
[#4:]
Vorgeſtern hat ſichs im Saal/ daß ein Soldat/ ſo neben andern
auff der Wacht für der Directionſtuben geſtanden/ vnd ſonder zweifel andere Ge-
dancken gehabt/ daß er die Mußqueten loßgebrennt/ zum Unglück aber Herr von
Kuppa/ neben noch einem andern Herrn/ gleich fürüber in die Direktion gegan-
gen/ ſolcher Schuſſz aber/ zu deſſen groſſen Glück/ als er gleich drey Schritt vom
Soldaten hinweg/ hinterm Rücken loß/ vnd in die Mauren gangen/ Der Soldat
aber als bald auff befehl zum Profoſen geführt worden.
[#5:]
Außm Läger vernimmt man anders nichts/ dazu daß dieſer tagen abermal ein
ſcharmutzieren fürgangen/ vnnd die ſofern dem Feind den Paſſz nach Cromau
von Budweiß auß/ benommen haben ſol/ Vnd wird die Bürgerſchafft von neu-
wem gar ſtarck zur Wacht gehalten/ wie auch an allen Orten vnd Häuſern ſtarck
vnd ernſter Befelch ergangen/ daß ein jedweder auff ſein Hauß mit Waſſer/ vnnd
dergleichen/ verſehen ſoll.