Aus Prag vom 6. Nouember.
[#1:]
En 1. dito ſeynd allein zu dieſem Crönungs Actu alle obriſte
Landeämpter als Vicetenentes, diß zu fernerer deß Königs
vnd LandsAnordnung mit nachfolgenden beſchribenen Per-
ſonen beſetzt worden.
1. Obriſter herr Burggraff/ herr Bohußlaw Bernkha/
2. Obriſter Landhoffmeiſter/ herr Wilhelm Lobkowitz.
3. Obriſter LandCammerer herr Johan von Tallnbergk.
4. Obr. Landrichter herr Wentzel Wilhelm von Ruppa.
5. Obr. Cantzler herr Paul von Rittſchan.
6. Obr. Lehenrichter herr Peter von Schwambergk.
7. Burggraff zum Carllſtein herr Graff Joachim Andre Schlick.
Ritterſtand.
1 Obr. Landſchreiber herr Caſpar Käpler.
2. UnderCammerer/ herr Procop Dwarßetſchty/
3 Under Burggraff zum Carlſtein/ herr Buhußlaw von Micholowitz.
4. Burggraff im Königl. Grätzer kräiß herr Heinrich Otto von Loß
Hierauff iſt die Crönung den 4. dito nachfolgender geſtalt beſchehẽ
Erſtlich nach dem jhr May. von den Herrn Ständen in die Schloß-
kirchen begleitet/ ſeynd ſie in S. Wentzelar Capeln geführt/ allda mit
dem Kön. Habit angethā/ hernacher 40 Prieſter in weiſſen Chorrö-
cken denen gefolgt 7. Prieſter in blawen Mändeln mit blawem Dop-
peldaffet vberzognen Hüeten vorgangẽ/ dieſen nach ſeynd gefolget die
Officierer ſo die Kleynodien getragẽ/ als der Erb: vnd Mundſchenck
deß Königreichs Böheim/ als der Erbſchenck ein ſilbern vergült/ vnd
der Mundſchenck ein ſilbern Veſſel/ hernach haben getragen jhr zwen
zwo vergüldte Schalen/ denen gefolgt der obriſte LandHofmeiſt. mit
dem Scepter/ jhme nach der obriſte LandRichter mit dem Reichsapf-
fel/ nach jhm der obriſte Burggraff mit der Cron in beyden Händen
tragend/ darauff deß Königreichs Böheim Herold in dem gebräuch-
lichen Habit/ mit einem weiſſen Stab/ dieſem nach der Cron Böheim
Erb. Marſchalck mit dem Kön. ChurSchwert/ mit einer roth Sam-
meten Scheyden/ darauff jhr May. mit bloſſem Haupt/ neben dero-
ſelben zur rechten Hand der Herr Adminiſtrator deß Böhm. Euang.
Collegii, zur lincken ſeyten aber/ ein anderer Böhmiſcher Prieſter/
beyde in braunen Sammeten Röcken/ die jhr May. zum Altar ge-
führt/ daſelbſt mit deroſelben niderkniend gebettet/ hernach ſie vom Al-
tar zu ruck in einen ſehr ſchönen mit haarfarbem Sammet vberzoge-
nen Stuhl/ darein ſie ſich geſetzt/ die Prieſter aber wider zum Altar
getretten/ daſelbſt der Adminiſtrator den Actum Latine angefangen/
darauff die Trommeten vnd Heerbaucken erſchollẽ/ hernach hat man
Lateiniſch Veni ſancte Spiritus, &c. anfangen zu ſingen/ und dar auff
in Böhmiſcher Sprach/ Gott der Vatter wohn vns bey/ geſungen/
hernach ein Collecten abgeleſen wordẽ/ nach demſelben iſt er zum Pre-
digſtul gangen/ ein weiſſen Chorrock angelegt/ vnd ſich auff die Can-
tzel præſentirt/ vnnd zur Predigt in Böhmiſcher Sprach geſchritten/
nach der propoſition vnd beſchehenem Gebet deß Vatter vnſers/ hat
man den 20. Pſalm geſungen/ auch in Böhmiſcher Sprach/ folgende
hat er fort gepredigt/ vnder deſſen drey mal Böhm. geſungen worden/
nach dieſem iſt die Predigt vollendet/ und der Herr Admimſtrator wi-
der zum Altar gangen/ allda die Litaney in Lateiniſcher Sprach/ dar-
auff die Muſic vnnd Trommeten abermals ſich vber die maſſen ſchön
hören laſſen/ folgends hat man auß dem Apoſtel Paulo an Timo-
theum vorm Altar geleſen/ vnnd darauff 2. Böhm. Lieder geſungen/
Ferner haben mehr gedachte beede Prieſter neben dem Herrn obriſten
Burggrafen/ obriſten LandHofmeiſter/ vnnd obriſten LandCamme-
rern jhr May von dero Seſſion zum Altar begleitet/ daſelbſt ſie alle ni-
derkniend abermals gebettet/ nach dieſem ſeynd ſie zum Altar getret-
ten/ ſich mit jhrer May wegen deß gewöhnlichen Eyds vnderredet/
darauff der Herr obriſte Burggraff zum Volck geſprochen: Dieweil
ſie nun mehr im werck jhr May zu Crönen/ ſo wolten ſie ſich noch-
mals in geſambt ermahnt vnd gefragt habẽ/ ob es jhr will auch ſey/ daß
man jhr May Crönẽ ſolte/ darauff das Volck einhelliglich geſchryen:
Wir wollẽ/ hernach er ſolches zum andern vnd dritten mal widerholt/
ſie aber allzeit/ wir wollen/ geantwortet/ darauff man jhre May ein
Buch vorgehalten/ auff welches ſie zwen Finger gelegt/ vnd den Herrn
Ständen in Böhmiſcher Sprach den gewöhnlichen Eyd geleiſtet/
welchen der Obriſte Burggraff ihrer Majeſtät vorgeleſen/ deme ſie
nachgeſprochen/ auff dieſes ſeyn jhre Majeſtät vor dem Altar nider
gekniet/ da der Herr Adminiſtrator vor jhrer Majeſtät ſtehend/ ein
vergüld Büchſlein mit Salben auff dem Buch gehalten/ mit einem
Finger ein wenig daruon genommer/ vnd jhr Majeſtät oberhalb der
Stirn/ gleichſamb wie ein Creutz damit beſtrichen/ hierauff gab der
Herr Marſchalck dem Adminiſtrator das Schwert in der Scheyden
ſteckende/ der es jhrer Majeſtät jn Lateiniſcher Sprach per Domi-
num noſtrum leſum Chriſtum, Amen, geantwortet/ nach ſolchem
den Scepter/ hernach den Reichsapffel/ folgends ein roth Heublin/
dieſem nach/ nam der Herr Adminiſtrator die Cron/ daran griff Herr
obriſter Burggraff/ Herr obriſter Landhofmeiſter/ Herr obriſter
LandCammerer/ vnd des ander Prieſter/ vnd ſetzten ſie jhrer Maje-
ſtät in dem Namen der heyligen Dreyfaltigkeit auff/ folgends wurde
er mit Cron vnd Scepter wider auff den ſtul begleitet/ alß dann der O-
berſte Burggraff zu den herrn Stenden ingeſampt geſprochẽ/ dieweil
nunmehr jr gnädigſt König vnd Herr Gecrönet/ ſo werden ſie neben
jhme/ wie gebräuchlich/ zur Cron ſchweren/ vnd dieſelbe vor jren gnä-
digſten König ond Herrn erkeñen/ Auff dieſes hat der Oberſte Burg-
graff/ jrer Maj. den ReichsApfel vnd die hand geküßt/ auch mit 2 fin-
gern die Cron berühret/ ſich vor jhrer Maj. geneiget vnd fortgangen/
deme die andern Officirer alle alſo gefolgt/ deren vngefehr bey 100. ge-
weſen/ hierauff der Herr Adminiſtrator mit heller ſtim̃ das Te Deum
laudamus geſungen/ welchn die gantze Muſica Trometen vnd Heer-
paucken gefolgt/ auch mit allen Glocken in den Prager Stätten geleu-
tet/ vnd die groſſen Stuck loß gebrant/ auch die Burgerſchafft und dz
geworbene Volck/ welches 13. Fähnlein vnnd etliche Compagnien
Reuter geweſen/ drey mal Salve geſchoſſen/ folgends haben Jhre
Mayeſt. fünff Herrn vnd Ritterſtands Perſonen/ ſitzende zu Rittern
geſchlagen/ nach dieſem ſeynd Jhre Mayeſt. ſolenniter auß der Kir-
chen zu der Taffel von den Herrn Ständen in groſſer Anzahl beglei-
tet/ daſelbſt ſie ebener maſſen zur Landtaffel/ altem herkommen nach/
geſchworen hernacher in Königlichem Habit zur Taffel/ neben dero-
ſelben Gemahlin geführet worden/ vnnd mit einander allein Taffel
gehalten/ vber vorerzehlte Königlichen Taffel ſeynd noch vngefehr
bey 14. abſonderliche den Officirern zu gehörige frey Taffeln geſpei-
ſet/ auch nach der Crönunge vblichem Gebrauch nach Geldt an Gold
ſnd Silber außgeworffen/ welchen der König zugeſehen/ es iſt auch
im Schloßplatz/ roth/ und weiſſer Wein/ eine gantze Stundt lang ge-
lauffen.
Jhre Mayeſt. haben mitten im Eſſen jhr die Cron laſſen abnem-
men/ ſeynd auffgeſtanden/ vnnd in Geſundtheit aller dreyer Stände
in Böheimb einen geſund Trunck außgetruncken/ vnnd herumb ge-
hen laſſen.
Auff morgen den 7. diß werden Jhre Mayeſt. die Königin gecrö-
net werden/ heut werden die Officia erſetzt/ vnnd werden Jhre Ma-
yeſt. nach der Königin Crönung/ in der Perſon nach Nürmberg
zu dem Vnionſtag verreiſen/ die Königin aber wirdt vnter deſſen hie
verbleiben.
Herr Graff von Manſfeld ligt nach vor Piſſeck/ zu dem ſind 1500. Mann zu fuß/ vnnd
300. pferd Pfältziſch volck geſtoſſen.
Des Boucquoy groſſe Niderlag wirt confirmirt/ vnd ſoll Bethlehem Gabor auff den
16. diß gecrönt werden/ hat gantz Hungarn in ſeiner deuotion auſſer Raab/ und Comorrn/
die herrn Palfi vnd andere/ ſo jm zu wider geweſt/ haben ſich an jn ergeben.