Auß deß Graffenhaage vom 15. Februarij. 1616.
A
Vß Franckreich können wir allnoch nicht eygentlich vernehmen/ daß
beyderſeyts Deputirte in der Friedenshandlung etwas fruchtbarliche;
verricht/ ſondern vielmehr geacht wirdt/ daß man mit ſolcher Tractation
wegen eingefallener harten Winterlichen Zeit nur verlängerung vnnd gewin-
nung der Zeit ſuchen thut/ vnd daß gegen prima vera der Bock erſt recht an-
gehen möchte. Wiewol andere deme zu wider geſchrieben/ daß zum Frieden
noch gute apparentz vorhanden ſeye/ vnd der König mit ſeiner Suyte in kurtzem
zu Pariß anlangẽ würde/ ſonſten war warhafftig/ daß wegen obgemelter Hand-
lung ein Anſtandt vff etliche Wochen gemacht ſeye/ das Kriegsvolck aber von
beyden Parteyen theten einander noch täglichs Abbruch/ vnnd an ſtatt das 6.
Compag. der Printzen Reutter ſollen erſchlagen ſeyn/ befind ſich jetzo das ge-
genſpiel/ daß nemblich der Printzen Volck dem Duc de Cuyſe etlich Volck
abgeſchlagen/ vnd guten theils ſeiner Bagagie erobert/ nun wie demallem/ gibt
die Zeit.
Sonſten verlaut daß vor wenig Tagen die Herrn Staaden Schreiben
vom Printzen von Conde bekommen/ vnnd daß ſie mit ſampt Jhre Pr. Excell.
derohalben ſo offter in Conſilia geweſt/ vnd ſich wie einer gebührlichen Antwort
darauff zugeben ſollen/ reſoluirt haben/ kan aber davon noch keine rechte Vmb-
ſtändigkeiten vernehmen.
Die Bireff ſo lich Vorgeſtert auß Londra bekommen/ meldten/ daß der
Sommerſet mit ſeinem Weib nach beſchehener Examination (dabey man be-
funden daß ſie beyde an deß verſtorbenen vnd vergebenen Ritters Todt vnd in
mehr andere wichtige Sachen ſchuldig) durch die 12. Juratores oder dar zu ver-
ordnete Herrn von der hohen Juſtitz zum Todt/ daß ſie beyde mit dem Strang
ſollen hingericht werden/ vervrtheilt worden ſeyen/ jedoch vorbehaltens/ wo ſie
etwas darwider vor zubringen wüſten/ daß jhrnn ſolches bevor vnd frey ſtehen
ſolte/ ſolten aber der Sententz ſchwerlich entgehen können.
Sonſten war der Viceadmiral/ wie auch der Conte Arondell (ſo vor die-
ſem gebunden/ vnd ebenwol wider ins Landt kommen) auch wichtiger Sachen
halben gefangen/ alles aber ward noch all verborgen gehalten/ Jhr Mayeſt.
war vom Podagra an einem Fuß etwas vbel auff geweſt/ doch nun wider friſch.
vnd geſund.
Vorwenig Tagen iſt ein Kriegsſchieff naher Engellandt abgefahren/
vmb den newen Ambaſſ. von dannen vff allhero abzuholen.
Jn dieſen Landten werden noch immerdar mehr KriegsPreparationes
vnd Kungſtreiche Feldtgereitſchafften gemacht/ vnd wie verlaut/ ſollen nicht al-
lein die Compagn. zu Fuß erstreckt/ ſondern noch in die 12. Cornetten Reutter
vffs new ehiſt geworben werden/ vmb alſo ein mächtigers Kriegsheer als jemals
zuvor ins Feldt zubringen/ weilen man genug ſpuͤrt daß die Spaniſche keine
ruhe haben/ vielweniger die Guͤlchiſche Landte außraumen/ oder den Xanti-
schen Vertrag vollziehen wollen/ den Erfolg gibt die Zeit.
Inmittelſt ſeynd die Soldaten ſo auß hiehiger Guardi deen Haͤnſeeſtaͤt-
ten vor Officirer gedient/ allhie wider zu ruͤck kommen.
Es ſeynd nicht allein zu See vnd zu Landt vornemblich Oſtwartz durch
juͤngſte Tempeſten vnd Jmundationes viel Schieff/ Leuth vnd Viehe ertrun-
cken/ ſondern es ſeynd vergangene Wochen auch verſchiedene Schieff ſo auß
Franckreich/ Engellandt vnd Seelandt in den Golfo der Maſen vermeynten
ein zulauffen/ durch den groſſen Eyßgang vberwältigt vnd in Grund getruckt
worden/ geſtallt daß man vff den Niederlaͤndiſchen Seeueſten taͤglichs ſtuͤcken
von Schiffen vnd deren eingehabten Guͤtern findet/ vnd ſeynd Vorgeſtert nit
weit von hinnen/ zwiſchen den Seedoͤrffern/ Scheueling vnnd Heyden vffm
Strand in die 18. Faß Fränſche Weinen/ zwo Tonnen Tartern ſampt andern
Guͤtern mehr gefunden. Gott verhuͤte ferner Unheil/ vnd woͤlle die Jntereſſir-
te in andern ergoͤtzen.